Esta é a entrada número 1000 e apetecíame que fose algo especial, por iso aproveito para contarvos a historia deste blog e que me poidades coñecer un pouquiño máis.
Pódese dicir que Ribadeo e o cine tivo tres momentos e lugares de nacemento:
O primeiro deles, e sen dúbida o máis importante, foi en 2010 na facultade de Ciencias Sociais e da Comunicación de Pontevedra, concretamente na clase de Historia do cine, cando Miguel Anxo Fernández (crítico e historiador de cine, escritor e gran mestre, entre outras moitas cousas), nos propuxo facer un traballo sobre algún aspecto do cine relacionado coa nosa vila.
Escollín facelo sobre "as salas de exhibición cinematográfica de Ribadeo" (título escollido para o meu traballo), xa que recordaba ben o peche do cine Teatro, a apertura de Cinelandia e tiña escoitado falar do vello cine Colón.
 |
| Portada do meu traballo |
Cando empecei a investigar non tiña moitos datos porque a miña familia non é de Ribadeo e ninguén me falara nunca dos cines de aquí. Todo o que sabía era o que vivira durante a miña infancia como espectadora no cine Teatro.
 |
| Butaca do cine Teatro |
A través de Internet e da prensa local, comecei a reunir información sobre as salas que houbera e por primeira vez fixeime no moito que me gustaba o Colón e no pouco que reparara nel. Pasara miles de veces pola Praza de Abaixo e asistira a moitos concertos que a Banda de música daba no palco instalado diante daquel cine, pero nunca me decatara no fermosa que era aquela fachada de estilo art déco, por aquel entón recén pintada e restaurada.
 |
| A taquilla do Colón |
Ata aquel momento eu pensaba que o Colón era o cine máis antigo de Ribadeo e para a miña sorpresa, contáronme que xa nos anos 30 existira outro, o Galaxia. Tamén comprobei que antes do Colón xa estaba o Teatro, que acollera proxeccións desde 1912.
 |
| Anuncio do Galaxia |
Con todos os datos que obtiven puiden elaborar unha cronoloxía dos cines ribadenses e unha breve descrición sobre cada un. Completei o meu traballo cos recordos de Amadeo, recollidos no seu libro Ribadeo. Recordos de infancia, onde tamén inclúe a única foto do Colón en funcionamento que puiden ver. Ademais, prestáronme algúns programas de man, os primeiros que vía e que me pareceron preciosos.
Despois de entregar o traballo (co que saquei moi boa nota, por certo), a información quedou esquecida nun disco duro.
Durante un tempo seguín almacenando todos os datos que atopaba relacionados co audiovisual en Ribadeo, sen saber moi ben por que o facía, pero tendo cada vez máis claro que necesitaba buscar unha forma para organizalos. Isto, unido ás ganas de compartilos cos demais dalgún xeito e tendo en conta que calquera cousa me parecía máis divertida que centrarme no meu proxecto de fin de máster, levoume a rexistrarme en Blogspot.
Pouco a pouco fun ordenando a información e reconstruíndo as carteleiras
dos cines coa axuda dos anuncios da prensa, pero non me animei a publicar nada.
O 12 de xaneiro de 2012, nunha tarde tranquila de traballo na TVG2, decidín
publicar a miña primeira entrada do blog: “Os cines de Ribadeo”. Antes de
escribila puxenme algunhas normas a min mesma:
- Non publicar máis dunha entrada ao día, xa que non quería quedarme sen contido unha semana despois.
- Non publicar información sobre a que non tivese datos fiables. (Motivo polo que hai tantas carteleiras incompletas no blog, xa que aínda que sei que durante moitos anos había proxeccións case todos os días da semana, só teño datos das sesións da fin de semana e dos luns).
- Non publicar datos de terceiros sen citar a súa procedencia, fundamental á hora de respectar e valorar o traballo dos demais.
Imaxe incluida na primeira entrada do blog
Uns meses despois, abrín unha conta de Twitter na que, a pesar de ser unha
comunidade pequeniña, fun chegando a máis xente e onde podo compartir novas do
día a día que non teñen cabida no blog.
Fondo do blog
Xa de volta en Ribadeo, continuei (e continúo) investigando coa axuda da prensa local, mentres fun vendo como o blog ía collendo vida e as visitas aumentaban, especialmente en 2015 e 2016, que curiosamente son os anos nos que menos publiquei.
Desde aquel primeiro post, escribo no blog de forma máis o menos regular,
fágoo como hobby, porque me gusta, porque me sigo emocionando cada vez que
atopo un dato novo que me axuda a esclarecer algunha das moitas lagoas que me quedan por cubrir na historia dos cines ribadenses e porque son feliz cando
atopo o anuncio da proxección dunha película que me gusta.
Son consciente de que hai bastantes aspectos que mellorar, como o deseño do
blog, e sei que hai entradas que gozan de menos popularidade, por exemplo a
carteleira de Cinelandia de maio de 2011, e a pesar de que nalgunhas épocas o
blog estivo máis parado por falta de tempo, de información nova e incluso de
ganas, sempre aparece algo que me leva a seguir.
Tiña a esperanza de que me tocase o Gordo para poder mercar o Colón, pero
adiantáronseme e, aínda que sufrín cando vin como derrubaban o seu interior,
manteño a ilusión de poder ver algún día máis fotos antigas do meu cine favorito.
Derrubamento do Colón
Entradas de Cines Ribadeo
Cartel de Cines Ribadeo
9 anos despois daquela primeira entrada alégrame comprobar que me queda
moito contido por compartir, moitas lagoas que tapar e moito audiovisual do que
gozar en Ribadeo.
E se despois de todo este rollo chegaches ata aquí, quero darche as
grazas por lerme e por visitar o blog e tamén te invito a dicirme cales son as
túas entradas favoritas ou a deixarme calquera comentario e recordo dos nosos cines
que che apeteza compartir.
