Cine no Nadal 2023

Ao igual que en anos anteriores, o cine formou parte da axenda cultural do Nadal ribadense de 2023.

As proxeccións tiveron lugar o 26 e 27 de decembro ás 17.30h en Cines Ribadeo e a entrada custou 2€.

La Voz de Galicia (26/12/23)

As películas que se puideron ver foron:

MARTES 26

- O corno (2023) Jaione Camborda

- Wonka (2023) Paul King

MÉRCORES 27

- Aquaman y el Reino Perdido (2023) James Wan

- Migración. Un viaje patas arriba (2023) Benjamin Renner e Guy - Laurent Homsy

Foto: Facebook Concello de Ribadeo

Cine LGTBIQ+ en xuño de 2022

En xuño de 2022, con motivo da celebración do Día do Orgullo LGTBIQ+ realizáronse diversas actividades, entre as que se incluiu a proxección de 2 películas no Cine Teatro: Carmen y Lola e Sedimentos.

25/06/22 (La Voz de Galicia)

Carmen y Lola, dirixida por Arantxa Echevarría, presenta a historia de dúas mozas xitanas que comezan unha relación, a pesar do rexeitamento das súas familias e das discriminación sociais ás que se ven sometidas.

Sedimentos é un documental dirixido por Adrián Silvestre que recolle os testemuños de 6 mulleres trans durante uns días de convivencia, desde unha perspectiva respetuosa que aboga pola diversidade.

Ribadeo e o cine: AS BESTAS

Desde o venres 18 de novembro ata o xoves 15 de decembro de 2022 estivo na carteleira de Cines Ribadeo a película As bestas, dirixida por Rodrigo Sorogoyen e protagonizada por Luis Zahera, Marina Foïs, Denis Ménochet e Marie Colomb.

En febreiro de 2023 celebrouse a 37º edición dos Premios Goya e As Bestas foi a película máis premiada da noite, con 9 galardóns entre os que se incluia o de mellor película. 

Isto provocou que o filme volvese á carteleira dos cines da nosa vila: do 5 ao 16 de febreiro e do 24 de febreiro ao 16 de marzo.

As bestas, rodada en galego, francés e castelán, presenta a Antoine e Olga, unha parella de franceses instalada nunha aldea do interior de Galicia. Alí levan unha vida tranquila, aínda que a súa convivencia cos veciños non é tan idílica como lles gustaría. Un conflito cos irmáns Anta fará que a tensión aumente na vila ata acadar un punto sen retorno.

2022: Porta nova no cine Teatro

A mediados de agosto de 2022 eliminouse a reixa da entrada principal do cine Teatro e foi sustituida por unhas portas brancas.

Aquí podedes ver o antes e o despois da fachada do Teatro:

Antes:

Agora:

Concerto de música de cine 2023

O 25 de agosto de 2023 ás 20.30h celebrouse no Auditorio Hernán Naval o concerto de música de cine que cada ano ofrece a Banda Municipal de Música de Ribadeo.

Ao igual que en ano anteriores, a interpretación das bandas sonoras estivo acompañada da proxección de fragmentos das películas.

A BSO de Grease foi unha das interpretadas pola Banda

Pesadillas 2: Noche de Halloween en Kids & Us

O venres 3 de novembro de 2023, a academia de inglés Kids & Us organizou unha noite de cine de Halloween para os maiores da escola (os Tweens de 1, 2 e 3).

A película que viron, proxectada en versión orixinal e escollida por votación na clase, foi Goosebumps 2: Haunted Halloween (Pesadillas 2: Noche de Halloween).

Para celebrar Halloween tamén se disfrazaron e fixeron o truco e trato, entre outras actividades.

"Camarada Fraga: memoria dun franquista"

O venres 24 de marzo de 2023 ás 20.30h proxectouse na Casa do Viejo Pancho o documental "Camarada Fraga: memoria dun franquista".

O acto, organizado pola Asociación Cultural Francisco Lanza, estivo presentado por María Luisa Mon Bellón e contou coa participación de Manuel Monge, guionista do documental e membro da Asociación pola Recuperación da Memoria Histórica da Coruña.

"Camarada Fraga: memoria dun franquista" mostra a cara B de Manuel Fraga, Ministro de Información e Turismo durante o franquismo e posteriormente Presidente da Xunta de Galicia, analizando o seu papel como membro activo da ditadura.

Ribadeo e o cine: MATRIA

O venres 24 de novembro proxectouse no Auditorio Hernán Naval a película Matria, dirixida por Álvaro Gago e protagonizada por María Vázquez.

Pola mañá celebráronse dous pases para os centros de ensino, seguidos dun coloquio co director, e ás 20.30h outro para o público xeral, coa entrada a 3€.

Álvaro Gago no coloquio co alumnado do IES de Ribadeo Dionisio Gamallo

As proxeccións formaron parte das actividades programadas con motivo da celebración do Día Internacional da Eliminación da Violencia contra a Muller.

Esta non foi a primeira vez que se puido ver Matria en Ribadeo, xa que o filme estivera na carteleira de Cines Ribadeo do 24 ao 30 de marzo de 2023.

Matria presenta a historia de Ramona, unha muller cun matrimonio infeliz que ten un traballo precario nunha conserveira. Ante dita situación e os desafíos da rutina diaria, Ramona refúxiase na relación que mantén coa súa filla e a súa neta.

Hai que destacar que Matria conta con dúas nominacións aos Goya 2024: a de mellor actriz para María Vázquez e a de mellor dirección novel de Álvaro Gago.