A última viaxe do afiador

Este venres 31 de xullo ás 22.30h proxectarase no parque de San Francisco (no Teatro en caso de que chova) o documental A última viaxe do afiador, dirixido por Aitor Rei.

A última viaxe do afiador (2013) Aitor Rei

"Queicoa" significa en Barallete (a lingua dos afiadores) Deus, heroe, loitador, ser grande e mítico. Dende hai máis de tres séculos ata os nosos días, aos vellos afiadores de moita sona, con moitos camiños e milleiros de quilómetros ás súas costas, chámanlles "Queicoas".

Eran homes bravos, duros, curtidos de traballar nos campos coa única compaña do xirar dunha roda.

Esta é a súa historia e estes son os seus rostros...

A proxección forma parte do proxecto "Achega. Cinema en movemento" que pretende dar a coñecer o patrimonio cultural e etnográfico galego a través de asociacións, concellos ou centros de ensino.

Axenda cultural de Ribadeo

Cine no IV Festival Jazz & Blues

Do 18 ao 26 de xullo, celebrouse o IV Festival de Jazz & Blues de Ribadeo.

Ademais de concertos e cursos de baile e música, o festival incluíu a proxección do documental A film about kids and music, dirixido por Ramon Tort.

A film about kids and music (2012) Ramon Tort

A film about kids and music é un documental sobre a Sant Andreu Jazz Band. A orquestra, dirixida por Joan Chamorro, reúne a nenos e nenas de entre 6 e 18 anos ao redor dun repertorio de jazz clásico que enche os auditorios máis importantes do país.

A película é unha viaxe da man do director de orquestra, que nos sumerxe nun método de ensinanza tan singular como os resultados que consegue. 

Aquí podedes ver o tráiler do documental:

Entre Marbella e Torremolinos

Desde o pasado día 15 e ata o próximo mércores 29 de xullo, pode verse no Forte de San Damián a exposición "Entre Marbella e Torremolinos. Imaxes de manicomio". 

A mostra recolle algunhas das fotografías que Xosé Reigosa fixo no último ano do hospital psiquiátrico de Castro, antes do seu peche en 2012.

Ademais das fotografías, na exposición pode verse un documental realizado por Xosé Reigosa e no que se recollen testemuñas de traballadores e internos do hospital.

Aquí podedes ver o documental Entre Marbella e Torremolinos:

Videoclip de Sun Face

O pasado venres 26 de xuño estreouse no bar Amodiño o videoclip do tema Negrita, do grupo ribadense Sun Face.

Ademais da presentación do videoclip, realizado por Elfarero, o grupo deu un pequeno concerto.

24/06/2015 (Crónica3.com A Mariña)

Aquí podedes ver o video de Negrita:

Fotogramas do videoclip

Maio de 2015: Curtas no rural

O pasado mes de maio, Ribadeo en Común organizou a proxección de curtas en varias parroquias ribadenses: Piñeira, Ove, Rinlo, Cedofeita e Remourelle.

13/05/2015 Crónica3.com A Mariña

As obras proxectadas foron Tempo de recolleita, Nacimiento e Comprometidas: productos ecológicos y medio rural.

Tempo de recolleita (2008) Félix Blume

Nacimiento (2012) Sergi González

Comprometidas: productos ecológicos y medio rural (2009) Fundación Biodiversidad

Ribadeo e o cine: GALATASARAY - DÉPOR

O pasado xoves 18 de xuño, tivo lugar a proxección da película Galatasaray - Dépor, organizada polos alumnos do curso de Dinamización, programación e desenvolvemento de accións culturais do CIFP Porta da Auga.

A entrada foi de balde e os asistentes foron obsequiados con flocos de millo.

Galatasaray - Dépor (2005) Hannes Stöhr

O filme narra catro sucesos similares que ocorren no mesmo día (o da final da Champions entre o Galatasaray de Estambul e o Deportivo da Coruña), ao mesmo tempo, en catro cidades de Europa.

En concreto, trátase dos roubos de equipaxe que sofren unha muller de negocios en Moscú, un peregrino húngaro en Santiago, un excursionista en Estambul e unha parella francesa en Berlín, e os problemas que este feito lles causa, especialmente coa policía debido ás diferenzas de idioma.

Verán 2015: Escola de cine de MAUmarela!

Ao igual que o verán pasado, durante os meses de xullo e agosto e coincidindo coas vacacións escolares, MAUmarela! ofrece actividades variadas para os máis pequenos: talleres de ciencia, de arte, xadrez, arquitectura e unha escola de cine.

Para máis información, podedes visitar o seu perfil de facebook.