2022: Porta nova no cine Teatro

A mediados de agosto de 2022 eliminouse a reixa da entrada principal do cine Teatro e foi sustituida por unhas portas brancas.

Aquí podedes ver o antes e o despois da fachada do Teatro:

Antes:

Agora:

Concerto de música de cine 2023

O 25 de agosto de 2023 ás 20.30h celebrouse no Auditorio Hernán Naval o concerto de música de cine que cada ano ofrece a Banda Municipal de Música de Ribadeo.

Ao igual que en ano anteriores, a interpretación das bandas sonoras estivo acompañada da proxección de fragmentos das películas.

A BSO de Grease foi unha das interpretadas pola Banda

Pesadillas 2: Noche de Halloween en Kids & Us

O venres 3 de novembro de 2023, a academia de inglés Kids & Us organizou unha noite de cine de Halloween para os maiores da escola (os Tweens de 1, 2 e 3).

A película que viron, proxectada en versión orixinal e escollida por votación na clase, foi Goosebumps 2: Haunted Halloween (Pesadillas 2: Noche de Halloween).

Para celebrar Halloween tamén se disfrazaron e fixeron o truco e trato, entre outras actividades.

"Camarada Fraga: memoria dun franquista"

O venres 24 de marzo de 2023 ás 20.30h proxectouse na Casa do Viejo Pancho o documental "Camarada Fraga: memoria dun franquista".

O acto, organizado pola Asociación Cultural Francisco Lanza, estivo presentado por María Luisa Mon Bellón e contou coa participación de Manuel Monge, guionista do documental e membro da Asociación pola Recuperación da Memoria Histórica da Coruña.

"Camarada Fraga: memoria dun franquista" mostra a cara B de Manuel Fraga, Ministro de Información e Turismo durante o franquismo e posteriormente Presidente da Xunta de Galicia, analizando o seu papel como membro activo da ditadura.

Ribadeo e o cine: MATRIA

O venres 24 de novembro proxectouse no Auditorio Hernán Naval a película Matria, dirixida por Álvaro Gago e protagonizada por María Vázquez.

Pola mañá celebráronse dous pases para os centros de ensino, seguidos dun coloquio co director, e ás 20.30h outro para o público xeral, coa entrada a 3€.

Álvaro Gago no coloquio co alumnado do IES de Ribadeo Dionisio Gamallo

As proxeccións formaron parte das actividades programadas con motivo da celebración do Día Internacional da Eliminación da Violencia contra a Muller.

Esta non foi a primeira vez que se puido ver Matria en Ribadeo, xa que o filme estivera na carteleira de Cines Ribadeo do 24 ao 30 de marzo de 2023.

Matria presenta a historia de Ramona, unha muller cun matrimonio infeliz que ten un traballo precario nunha conserveira. Ante dita situación e os desafíos da rutina diaria, Ramona refúxiase na relación que mantén coa súa filla e a súa neta.

Hai que destacar que Matria conta con dúas nominacións aos Goya 2024: a de mellor actriz para María Vázquez e a de mellor dirección novel de Álvaro Gago.

O cine Colón no cartel da IX edición do Festival de Jazz & Blues

O cine Colón é o protagonista do cartel da IX edición do Festival de Jazz & Blues de Ribadeo, que terá lugar do 2 ao 9 de decembro.

Ribadeo e o cine: O CORNO

Desde o venres 27 ata o martes 31 de outubro estivo na carteleira de Cines Ribadeo a película O corno, dirixida por Jaione Camborda e protagonizada por Janet Novás.

O filme, rodado maioritariamente en galego, obtivo a Cuncha de Ouro á mellor película na 71º edición do Festival Internacional de Cine de San Sebastián.

O corno presenta a historia de María, unha mariscadora da Illa de Arousa que é coñecida por axudar a outras mulleres nos partos con especial dedicación e coidado. Tras un suceso inesperado, vese obrigada a fuxir e viaxar para sobrevivir. Na búsqueda da liberdade, María cruza a fronteira por unha das rutas de contrabandistas entre Galicia e Portugal.

Ademais, neste blog queremos destacar a participación na película de Clara Maseda, secretaria de produción en O corno. Esta ribadense estudiou o dobre grao de Comunicación Audiovisual e Xornalismo na Universidade de Santiago de Compostela e forma parte do departamento de produción de Miramemira.

Clara Maseda tamén traballou noutros filmes como Sica (Carla Subirana, 2023) e na actualidade está dirixindo unha curta documental.